https://www.innews.media/uploads/news/2026-05/_innews_23cfd7b397d7ad813e6fdf9ee_o.jpg
Dünyanın ən böyük xeyriyyə qaçışlarından biri olan “Wings for Life World Run” 2026 bu gün yenidən minlərlə insanı eyni məqsəd ətrafında birləşdirməyi bacardı.
Dünyanın 190-dən çox ölkəsində eyni anda start götürən iştirakçılar bu dəfə də yalnız qaçmaq üçün deyil, onurğa beyni zədələrinin müalicəsinə yönələn elmi araşdırmalara dəstək olmaq üçün bir araya gəldilər.
Bakıda yarışın əsas başlanğıç nöqtəsi şəhərin ən gözəl məkanlarından biri olan Dənizkənarı Bulvar ərazisindəki Deniz Mall ticarət mərkəzi oldu. Ölkənin ən iri alış-veriş və əyləncə mərkəzlərindən sayılan Deniz Mall gün boyu idman enerjisinin, motivasiyanın və pozitiv ab-havanın mərkəzinə çevrildi.
Yarışdan əvvəl iştirakçılar üçün xüsusi atlet zonası təşkil olundu. Milli yığma üzvü, peşəkar atlet Hakim İbrahimov hamı ilə birlikdə isinmə məşqləri etdi, iştirakçıları starta hazırladı və bununla yarış öncəsi yüksək motivasiya mühitini formalaşdırmağa nail oldu.
Tədbir boyu səslənən musiqi, DJ çıxışları və dayanmadan davam edən yüksək templi ritm şəhərin ab-havasına tamamilə yeni bir nəfəs gətirdi.
Dənizkənarı Bulvar boyu uzanan marşrut iştirakçılara Bakının möhtəşəm mənzərələri fonunda qaçmaq imkanı yaratdı. Şəhərin canlılığı, insanlar arasındakı səmimi ünsiyyət və tədbirin yaratdığı birlik hissi yarışa özünəməxsus bir ovqat qatdı.
“Wings for Life World Run”-ı digər qaçışlardan fərqləndirən əsas xüsusiyyət isə ənənəvi finiş xəttinin olmamasıdır.
İştirakçılar “Catcher Car” onlara çatana qədər qaçmağa davam edir, öz limitlərini yoxlayır və böyük bir missiyanın ayrılmaz parçasına çevrilirlər.
Bu gün Bakı bir daha sübut etdi ki, idman insanları bir araya gətirən ən güclü enerjilərdən biridir.
